N’Asturies somos unes privilexaes y privilexaos.La suerte que tenemos les que vivimos equí de poder llevantar la cabeza y ver acullá. Ye mui difícil que dende cualquier requexu d’Asturies nun puedas ver un monte, una peña, un picu, un puertu o un cordal. Namás con mirar un poco p'arriba, ehí tán. El nuestru paisaxe ye inmensu, poderosu, imponente. 

Nun importa onde vivas, les montañes siempre tán ehí. Munches veces pa danos abellugu y facenos sentir en casa, siempre ufriendo los meyores puntos de vista. Tamién... pa retanos, pa danos aire, agua, oxíxenu y facenos esnalar y ventilar la tiesta. Y pa facenos parar y baxar el ritmu. Son una parte mui importante de la nuestra historia y identidá, y ye por ello que dende Puru Remangu quisimos rindir un homenaxe a les nuestres montañes

CORDALye una colección fecha pa que salgáis a caleyar y percorrer los cordales d’Asturies, pa caminar ente praos, pa facer rutes costeres, pa dir al monte los fines de selmana, pa montar en bici, y pa tolo que vos preste facer na natura. Esta colección ye una invitación de Puru Remangu a calzar les botes, los playeros y salir a ventilar. A pasu sele o al pasu que te preste llevar y siempre cola meyor compañía o en soledá, que tamién presta.

Dicíamos al entamu d’esta editorial que somos unes privilexaes y privilexaos n’Asturies porque, ente otres munches coses, podemos ver de lloñe. Subir a un picu, a una peña, a esi altu d’ehí… fainos ver muncho más, nueves perspectives y paisaxes únicos onde se xunta la mar cola montaña, o vemos otros mares de montañes y cordales. Asturies nun ye pequeña, al contrariu, ye inmensa. 

Asturies ta enllena de cordales y nós queremos salir a conocer el territoriu, a alendar aire fresco, a comer el bocadiellu pel camín y mirar el paisaxe, sentir los paxarinos, conocer la viesca, meter los pies en ríu al llegar, observar el cambiu de color de la viesca en cada estación y a esfrutar de vivir n'ún de los requexos más guapos del mundu. ¿Vienes con nós?